ខេត្តពោធិ៍សាត់ ៖ នាថ្ងៃទី១២ ខែឧសភា ឆ្នាំ២០២១នេះ លោក ម៉ៅ ធនិន សមាជិកគណៈកម្មាធិការកណ្តាលគណបក្សប្រជាជនកម្ពុជា អភិបាលនៃគណៈអភិបាលខេត្តពោធិ៍សាត់ និងជាប្រធានកិត្តិយស សមាគមអតីតយុទ្ធជនខេត្តបានអញ្ជើញចុះពិនិត្យដំណើរការសាងសង់ផ្ទះ និងការរៀបចំហេដ្ឋារចនាសម្ព័ន្ធមួយចំនួនដែលបានចែកជូនដល់អតីតយុទ្ធជនកម្ពុជា ជួបការខ្វះខាត់ក្នុងជីវភាព និងខ្វះទីជម្រកនៅទីតាំងសម្បទានដីសង្គមកិច្ច (ដីលំនៅដ្ឋាន និងដីកសិកម្ម) ត្រង់ចំណុចដំណាក់ត្រយឹង ស្ថិតក្នុងភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់។

ក្នុងឳកាសនោះក៏មានវត្តមានថ្នាក់ដឹកនាំមន្ទីរពាកព័ន្ធមួយចំនួន និងអភិបាលស្រុកភ្នំក្រវាញចូលរួមអមដំណើរ ផងដែរ ។ឆ្លៀតក្នុងឱកាសនោះលោកបាននាំយកវត្ថុកំដរមួយចំនួន រួមមាន៖ អង្ករ មី និងទឹកត្រី ទៅប្រគល់ជូនអតីតយុទ្ធជន និងគ្រួសារដែលចូលមករស់នៅក្នុងផ្ទះដែលទើបសាងសង់រួចផងដែរ ។

គួរបញ្ជាក់ថា តាមសំណើរបស់សមាគម តាមរយៈឯកឧត្តមទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា គោរពចូលមកសម្តេចតេជោ ហ៊ុន សែន ដើម្បីដោះស្រាយការលំបាកក្នុងជីវភាពរស់នៅ របស់អតីតយុទ្ធជនកម្ពុជា ក្នុងខេត្តពោធិ៍សាត់ ប្រមាណ៦២៨គ្រួសារនោះ, សម្តេចតេជោ បានផ្តល់ដីសម្បទានសង្គមកិច្ច នៅទីតាំងខាងលើ ហើយសម្តេចកិត្តិព្រឹទ្ធបណ្ឌិត បានទទួលរ៉ាប់រងក្នុងការសាងសង់ផ្ទះជូនពួកគាត់៕